யோபு 38:41காக்கைக்குஞ்சின் கூப்பாடு

பாலைவனத்தில் தாய் காக்கை தன் குஞ்சுகளை விட்டுவிட்டுப் போய்விடும் என்று பழங்காலத்தில் சொல்வதுண்டு. அந்தச் சின்னஞ்சிறு குஞ்சுகள் பசியோடு வானத்தை நோக்கிக் கூப்பிடும்போது, யார் அவைகளுக்கு இரை தேடிக் கொடுக்கிறார் என்று கர்த்தர் யோபுவைக் கேட்கிறார். மனிதர் கவனிக்காத, யாரும் பாராட்டாத அந்தச் சிறு பறவைக் குஞ்சையும் தேவன் மறக்கவில்லை. நம்முடைய கஷ்டமான நாட்களில் நம்மை மறந்துவிட்டார் என்று நினைக்கும்போது, இந்த வசனத்தை நினைவுகூருங்கள் — காக்கைக்குஞ்சையும் பராமரிக்கும் கை நம்மையும் பராமரிக்கிறது.